Track: H.uentedé (Llébana) - Hacheru - Peña Vieya - Vidrio - Áliva
Día de recuentros, con collacios, col monte, coles carreres, conmigo mesmu... Y nun ye quiciabes siquiera fuera la ruta que pensaba que diba devolvéme la ilusión por dir de monte, ya que a la Peña Vieya ya xubiera nuna travesera, pero siento que l'actividá que fice tornó a llenáme como nun me llenaren anteriores salides pel monte.
Poder amestar l'esfuerzu, la soledá y el disfrute personal de la carrera pel monte, con xuntame más tarde cola xente del GM Xuan de la Borrina (Benjamín, gracies por animate, nunca falles) y cola mió xente del Baskonia a los que téngo-yos un apreciu brutal, fué una pasada.
Alborecíemos, Kíla y yo, nel aparcaderu de Potes, dempués d'una xornada d'escalada en La Hermida col envís de dir empobinándonos hacia H.uentedé. De camín, tuve a bien parar un ratín a almorzar nel hostal Remoña n'Espinama y de pasu a mercar un bocata pa la ruta.
Dende H.uentedé vista de lo que vamos xubir corriendo
Bocata que pocu más y trastócame los planes porque pocu más y nun m'entra na mochila, ya que llevaba la 12 litros de correr. Con un bocadillu d'estes dimensiones ser capaz de meter dalgo de ropa d'abrigu pa la ruta casi me fai volver llocu.
El casu ye que pa cuando conseguí meter dalgo más d'abrigu, ropa pa mudar y garrar agua, ya casi taba abriendo'l teleféricu, poro la ventaya que tenía de llevar a los collacios taba mermándose considerablemente.
A les 10 menos cuartu, salimos Kíla y yo como dos tiros peles primeres ramples que llévenmos a la Senda l'Hacheru, faciendo los primeros metros a bon ritmu, ya que'l desnivel nun ye tan pronunciáu y viendo que Kíla va tan emocionada como yo ascendemos 300 m de desnivel hasta'l desvíu cola H.enduda en 20 minutinos.
Dempués de l'ascensión a fueu hasta'l Cable, siguimos corriendo hacia la Vueltona
Llueu entraría la parte más pindia, na que somos a caltener ritmu de carrera y los lladríos de Kíla al teleféricu entemécense colos miós camientos personales. Voi pensando como me presta esto de correr pel monte, lliberáu de la presión de guiyar, mirando tan sólo les condiciones físiques propies y non les de los demás.
Kíla ye una maquinina y siempre ta al mió llau pa estes xataes, sintiendo la verdá que ye la meyor compañera de monte que se puede llevar, siempre dimpuesta, siempre con ganes de correr, conocer, goler, tastiar tolo que'l monte ye a danos así, de gratis.... de gratis pero pasando por caxa col esfuerzu, cola ilusión por alcontrar les llendes del sufrimientu y el disfruta al empar.
Cuando soi tornar a la realidá, pasa otru teleféricu penriba y ya perdí la cuenta, así que'l restu del grupu nun sé ya cual pillaría siquiera, nin cuanto tendrá d'esperar por mí. Sigo corriendo, adelanto a una pareya de montañeros que lleven un ritmu bien guapu na parte más dura del Hacheru y sigo esforzándome por caltener el ritmu de carrera.
Xubimos al colláu la Canalona pa empobinanos hacia Peña Vieya
Cuando quiero dame cuenta, paso pembaxo de los edificios del teleféricu ya intento desapaecer a la vista de la xente xiblando a Kíla pa que nun vaya salir a saludar a tol mundiu. Miro'l reló y toi penriba'l cable en menos d'una hora.
Sigo cola vista tola pista que va pa la vueltona y nun soi a atopar a los collacios, mando un guaxap y pongo'l volume al móvil por si contesten, pa siguir corriendo adelantando a les marees de xente que van avanzando per Covarrobres salientes de tolos viaxes del teleféricu.
Fai un fríu que pela, el pantalón curtiu y la camisetina nun aiden demasiáu y el sol fai lo que puede a estos altores del añu. Poro, toca siguir corriendo, pasando a xente que coméntame que viéronme dende la cabina y flipen con Kíla tamién.
Ascensión con unes vistes increyibles... vaya día pal monte
Adelanto a xente y más xente, siendo ún de los díes que más montañeros atopo y que más montañeros atopo agradables, ya que nun paro de saludar y toos tien una sorrisa y unes bones pallabres. El día ta pa ello, fríu pero pa ello y los 3 graos que facía en H.uentedé al salir nun son dengún impedimentu pa esfrutar de los grandiosos Picos.
A lo lloñe, distingo l'andar de 4 presones que fáense familiares, poro aumento'l ritmu coles ganes de charrar un pocu y xuntame al mió grupu. Ye mui prestosa la soledá nel monte y l'entrenu, pero tar en menos d'hora y media na Vueltona, onde nos reunimos, faéseme más que suficiente y echo de menos les charres con Fernan, sobre monte y sobre toles alcordances que gastamos xuntos.
Del restu la ruta, que ya ficiera va unos añinos, tan solo remenbrar el perbon día de vistes que vamos teniendo y con un caminar, agora tranquilu, vamos ascendiendo hacia la Canalona, onde alcordámonos d'aquella ivernal a las Coteras Roxas nel que sofrimos les inclemencies del tiempu.
Cumal en Peña Vieya.... a 2614 m d'altor
Llueu de la Canalona, tendremos visión direuta a la pala de la Peña Vieya y xubiremos cola tranquilidá del que va casi de paséu. Tan sólo diremos animando un pelín a Amaya y yo atento de que Kíla nun tire denguna piedra, pero esta perrina ye la bomba y va xusto per onde-y voi diciendo.
Con pocu más que llevar el senderu más transitáu y garrar les llambries más llimpies aportamos al cumal de 2614 m de Peña Vieya, onde mientres Kilina ataca a los rivales más débiles... montañeros amantes de los perrinos a los qu'acompaña con sumisión a la gueta de dalgún cachín de bocata, los demás vamos tomando posición onde podemos, intentando quedar al solín y abellugándonos d'una brisina castronaca.
Taremos un ratín nel cumal, xintando un pocu y recuperando fuercies, pa descender cuando menos xente aventúrase pela palona de la Vieya. Con esto, intentamos que nun mos tiren piedres, nin tirales nós, pero la verdá ye que ta más llimpio de lo que recordaba.
Descendemos de la peña Vieya hacia la canal del Vidrio
Nel camín, ya decidimos baxar con Benjamín pela canal del Vidrio, pa que la conociese, mientres qu'Amaia y Juanan descenderán de nuevu pela Canalona. A bon ritmu, Benjamín, Fernan y yo, facemos tola fastera de las Coteras Roxas, intentando embocar hacia'l senderu que va pal Vidrio lo más llimpiamente posible.
Con too, en tarrén tan caóticu siempre toca dalgún destrepe qu'otru pero siempre, mui entreteníos y siempre atopándose un claru senderu h.itáu en cada pasu. Baxo los hermosos cumales del Cordal de Xuan de la Cuadra diremos avanzando hacia la envuelta que tien de llevanos a la canal del Vidrio.
Nun hai coses rares nel nome d'esta canal, simplmente afuracábase'l monte pa sacar silicio y facer vidrio, asina que'l nome-y vien de tal actividá. Con esto, queda claro que pa los que nun lo conozan, vamos descender per una cantera dafechu, asina qu'alcontrar piedra suelto y tarrén inestable ye parte del xuegu.
Facemos la escarnada canal del Vidrio descendiendo hasta Áliva
Caún al so ritmu, vamos descendiendo la canal, paeciéndo-y un pocu mala a Benjamín pero sin mayores problemes aporta a la baxera de la canal. Llueu más tranquilos, diremos camín alantre hacia Áliva, onde despídome de Fernan y Benjamín que tienen que volver hacia'l Cable.
Pela mió parte, decido conocer un senderu nuevu pa mí, siguiendo'l conseyu de los montañeros que perpasara nel Hacheru y que más tarde compartiéramos cumal na Vieya. Dende equí, anque nun lo vayan lleer, da-yos les miós fonderes gracies por compartir esti camín pa tornar a H.uentedé, que pa mín, fue dafechu perfeutu pa completar una actividá montañera-correndera de restallu.
Con una temperatura muncho más agradable n'Áliva y con Kíla recuperada del secañu que gastaba nes riegues de los praos, entamamos a correr de nuevu, travesando los praos al llau del refuxu y baxando pela pista col envís d'empobinanos hacia los iveranales d'Igüedri.
Tornamos a correr peles pistes d'Áliva hasta los ivernales d'Igüedri
Según voi baxando nun pueu facer otra cosa que parar a sacar una semeya al paredón de Peña Olvidada y Peña Vieya, asína como al refuxu y sigo corriendo cuesta abaxo como si acabara d'entamar el día de monte.
Bien ceo, alcuéntrome nos iveranels d'Igüedri y pocu más alantre atopo tamién la ponte de madera que comentárenme los amables montañeros. Toi na Portilla del Boqueh.ón y como bien me dixeren, sal un PR marcáu que según el cartelo tien de dexame en H.uentedé en 1h y 45 minutos.
Crucio la ponte del rigu Nevandi y entamos a correr per unes traileres con escaleres de maera que me faen descender un bon desnivel, pa pocu a pocu, entamar a llanear con tramos de xube y baxa mui prestosos de correr.
Fadremos un perguapu entrenu pel camín pente Igüedri y H.uentedé
Nel intre, tovía voi per monte baxo, pero pali pali voi meteme nun preciosu fayéu que baxo los parés de los picos de Valdecoru, va facer que correr per equí seya tou un agasayu pa los sentíos. De xuru, que toi alcontrándome col monte de nuevu, esfrutando de la soledá y la carrera, pero tamién de l'alderique tranquilu, les vistes y la bona compañía d'otros montañeros.
Kíla recuperada, llévame a unos ritmos que casi nun soi a creyer, alcordándome del sufrimientu de Güeyinos y de les ganes que tengo de tar recuperáu del too, pa dar lo máximu de mí nes carreres y en xeneral de toles actividaes montañeres.
Con un tastu brutal de l'actividá, vamos averándonos a H.uentedé asomándose tola muria caliza que ta penriba d'esti guapu llugar. Paramos el reló al aportar a la furgoneta y cayemos rendíos los dos, faciendo esti últimu tramu en 45 minutos dende la ponte y nun total de ruta de 23,10 km, 1920 m de desnivel positivu y negativu y 6 hores y 45 minutos de duración.
Si Kíla dempués de xintar agua na furgo sólo tien fuercies pa lladrar al teleféricu dende la solombra y tumbada, yo les tengo namás que pa llevantáme, mudame de ropa y dir a tomar unes cerveces bien fríes colos collacios primeru nel chigre del teleféricu y llueu más tranquilamente nel Hostal Remoña cerrando una circular en tolos sentios jajaja.
Camudando'l Camín lladrando a los chismes del aire
No hay comentarios:
Publicar un comentario