miércoles, 17 de enero de 2018

La Güeria d'Urbiés (Mieres) - Picu Tres Conceyos

3 d'Avientu de 2017

Track: La Güeria d'Urbiés (Mieres) - Picu Tres Conceyos


Nevadona perimportante y día pelín más gafu de lo esperáu, poro intentar ascender dalgún monte d'altor ensin les condiciones afayaices... nun tien xacíu. Asina que, como siempre, tiramos de la carpetina de pendientes, echámos-y una güeyada y vemos que'l Picu Tres Conceyos, pente les cuenques del Caudal y Nalón, taba esperándonos.

Muncho más guapu de facer con ñeve, salimos dende Xixón pela minera p'almorzar en Mieres. Ellí, axuntámonos y siguiremos camín per Figareo hacia'l Val.le Turón, pasando pelos pueblos de Peñule, Cortina, Cauxal, Turón, El Llegu, La Rebaldana, Santandrés y ya dempués d'unes envueltes a Urbiés y un pelín más alantre, La Güeria.

Partimos dende'l pueblín de la Güeria (665 m)

Como amuesen les semeyes el día ta pelín desagradable, poro namái qu'entamamos a caleyar peles cais de la Güeria, toi más convencíu de la que decisión fué acertada. Perpasaremos el barriu la Frecha y salimos pente la fueya en direición la Fuente Riga onde con pocu desnivel ganáu ya tamos pisando ñeve.

Xubiremos pelos caleyos del pueblu hasta la parte alta onde alcontramos ñeve bien ceo

Siguiremos ascendiendo per bonos senderos, ganando altor y ganando centímetros de ñeve, lo que préstanos ya que veníemos con ganes de bregar un ratín. En pocu más, alcanzaremos la pista que vien dende la Colladiella, pero nun vamos garrala p'averanos hacia'l Picu Tres Conceyos, sinon que bordiaremos hacia la Campa La Espinera.

De Fuente Riga pasamos a garrar pista amplia hacia la Campa La Espinera

Aportaremos a la Campa La Espinera onde damos vista hacia Llaviana, amosándose increyiblemente alpina la Pena Mea, pero pocu más alantre somos a ver, ya qu'una boina tapez tol horizonte y pente ellos los dosmiles ayeranos a los que teníemos ganes de visitar nesta xornada.

Garramos la cuerda de la Xerra Alta hacia la Revoltona

Reafirmáu no acertáu de la mió decisión, decido meté-y un pocu de picante al asuntu y envede bordiar la cumera del cordal de Xerra Alta, vamos metenos al crestéu y bregar un pelín cola ñeve ya que, más menos, nel intre les temperatures taben acompañando.

Caún al so ritmu vamos avanzando de camín a la Revoltona (1080 m)

Fadremos tol crestéu abriendo buelga cola ñeve a tramos pela rodiella y alcanzaremos los 1080 m de la Revoltona, que según los mapes tien vértice xeodésicu, pero debe ser ún d'estos piquiñinos o taba estrozáu dafechu porque nun lo vimos per dengún llau, jeje.

Descensu de la Revoltona y rápidu ascensu al Tres Conceyos

De toes, toes siguimos, unos raquetiando y otros bregando un pelín más, cosa que vien estupéndamente pa entrenar pa les carreres de monte. Tocará baxar de la Revoltona y facer un crestéu más cómodu hasta la Campa Cimera, onde entamamos un cenciellu ascensu hasta'l cumal del picu Tres Conceyos.

Cumal del Picu Tres Conceyos (1089 m)

Dende los 1089 m del Tres Conceyos, tamos pisando Mieres, Samartín del Rei Aurelio y Llaviana, pero como tira un airín castrón del norte, toca colar d'ellí, cagando virutes que tampoco ye que tengamos ganes de pasar fríu a lo tuntu.

Descendemos del Tres Conceyos hacia la Colladiella

Coles mesmes, entamamos el descensu hacia la pista que percorre tol cordal y baxaremos apriesa ya ensin esfuerzu pela L.lomba'l Xabugal hasta les cabañes de L'Arquera. Ellí fadremos una envuelta, pasando de visitar el Monumentu al Mineru y descendiendo cómdamente hacia la Güeria de nuevu.

Descensu tranquilu esfrutando de la seronda tardía hasta la Güeria

Pisando fueya abondo y dalgún champán qu'otru, aportaremos a la Güeria pel barriu del Suquitu, teniendo que caleyar unos cientos de metros hasta l'aparcaderu, onde dexaremos los coches unes 4 hores enantes.

En resume, ruta curtia, pa un día así con priesa y con ganes de pisar ñeve, que nel so percorríu de 8,3 km y 530 m de desnivel acumuláu positivu, dará al menos pa facer fame y conocer un pelín esti cordal llende pente ambes cuences mineres

Camudando'l Camín nel entamu del iviernu astur

No hay comentarios:

Publicar un comentario